voorafbepaalde vlug
dartelend op verbeeldingsvlug
vry, maar tog standvastig
vlerkspan nou geknip … in brons verewig
waar gaan jy heen?
waar was jy oral?
hoe is jy gevorm
in die gedagtewêreld van ‘n dromer?
tydloos is jou vlug
stilstaande pseudo-ademlose beweging
hoë vibrasie dog kalm-energie
wat die relevansie van tyd kan waarneem en waardeer
jy…
poortwagter na geluk en sielsbalsem
van geesteswêrelde
skugter van natuur,
jou hier-wees blote kismet
voortaan sal jy dartel … dan stilstaan
by my doodsbed.
verheug sal my stadige sielsfrekwensie
versnel en op die toppunt vibreer
om joune te reflekteer weerkaats
in kleurryke glans
waar gaan jy heen?
waar was jy oral?
hoe is jy gevorm
in die verbeeldingswêreld van ‘n visioenêr?
© Christa Kleynhans, 2025