parentese
met ‘n blik
op ‘die geblindoekte man’
olie op doek van marlene dumas
is daar rede
tot ‘n woordestilstand
om dus tevergeefs
die evosere stroom te keer
roep ek uit ‘n armirus
(in my ruim
binne my grense
transtekstuele kruisermissiele van huxley
se beavis siende blind
ploeter tussen morele bomrommel
en reünes van vrede
interkontekstuele ballistiese vuurpyle van milton
so blindsiende soos sy simson
later met sy binne-oë kon kyk
om die tempel op die filistyne te laat tuimel
en meedoënloos
die tussenmedia-onbemande-lugvoertuie
van dumas self
ek onthou die patriarg van jacobsdal
cornelis statig soos sy pinotage wingerde
op pad na polkadraai
dans sy bosstokke aan die rand van kuilsrivier
kyk dit uit oor die frommelblik kaapse vlakte
die rooksloop ‘n blinddoek teen die berg
en dan die see wat agter spieël
zoem-zoem haar gewapende hommeltuig
gooi sy granate
gerhard richter se bader meinhof reeks
onttrek herontdek en weer
op ‘n nuwe doek beskryf)
maar is die digter
nou oëloos in gaza
© Krige Visser. 2025
https://artreview.com/artist/marlene-dumas/?year=2008/1000