Anekdote
Johann de Lange
kort voor sy dood vertel hy
met ’n geamuseerde laggie
die vismotte het sy boeke
byna opgevreet – bokse vol
wat nooit ná sy laaste trek
veilig op ’n rak gepak is nie
ons weet dié goggas vluglees
en slaan vervelige dele oor
hulle is ook gomsnuiwers
wat hoog raak op hardebande
nou wonder ek: het hy heimlik
met die vismotte gesimpatiseer?
© Daniel Hugo, 2025
Ek moet ook bely: Daar skuil iets vismotterig in myself.
‘n Mooi gedig gelaai met implikasie oor sy afskeid en vertrek.
Ek het Johann nie goed genoeg geken om my te kan uitspreek waaroor jy wonder nie, Daniel. Maar van vismotte weet ek: Hulle verslind enigiets wat na boekstawing ruik.