Langpad
As ek die langpad myne maak
en ʼn rugsak pak
met net dit wat nodig is,
as ek mismoedigheid en haastigheid
agterlaat
sal ek lig kan reis
en met elke tree wat ek loop
nuwe vryheid koop.
As ek die wye wêreld my tuiste maak
en bome en berge my geselskap raak,
sal horisonne my bly roep.
Dan sal die blink sterrehemel
in die nag
en elke helder sonskyndag
my kalender en my kompas wees.
Ek weet dat ek dan
sonder engtevrees
uiteindelik
sal ophou soek,
tevrede
met die slothoofstuk
van my boek.
© Andrea Sieberhagen, 2025