Geklief
in ‘n land
waar gemsbok geëts teen rooi songloed troon
en hiëna gevlek al asend jou hoon
waar pou en korhaan in vroegskemer krys
en oerduin massief teen woestynlug verrys
waar maanlig gesekeld oor geil weiveld gaan
en skitterend-melkweg tot jakkalsroep taan
kameeldoring geanker in hierdie land
penwortel diepdringend deur rooi woestynsand
in ‘n land waar rivierloop na reënstorm bruis
bid dogters en seuns vir Sy krag na kruis
in ‘n land
waar kreature afgesonder afgeskei
deur onnoembare eeue met buidel gedy
waar reënbooggevlerktes glansend al hoër
langs spierwit gevleueldes grofkrassend in koor
waar deinings in silwer sterf teen die kus
oor verraderlik rots waar menig visserman rus
bloekom geplaas in hierdie land
blare en bessie en bas wat brand
in ‘n land waar delgende vuurstorms ruis
rou dogters en seuns oor verdorwenheidskruis
geklief is my hart
twee kamers met rooisand
twee kamers wat brand
© Stephan du Toit, 2026