Blouwalvis
op die Kunstenaarsdoek is jy die grootste ooit
heerser oor die blou aarde oor die dolfyn
die inkvis makriel en marlyn
honderd voet lank jou koninklike mantel
tweehonderd ton word deur jou troon gedra
‘n duisend myl ver word die koningin geroep na jou
seeryk in die koue waters van antarktika
vir ‘n miljoen jaar was die moordvis
ál wat jou bedreig
maar ons
ons met ons harpoene gelaai met plofstof
ons fabriekskepe wat jou slag en verwerk
ons vragskepe
plastiekbesoedeling
onderwatersonars
óns moor jou!
sal jy aanhou heers?
aanhou pendel tussen die pole en die trope?
aanhou verwondering bring in ‘n blasé wêreld?
of sal eendag vir oulaas eggo
in die seestrate langs Afrika se kus
die klaende diep buiksang van die
grootse Balaenoptera musculus?
© Stephan du Toit, 2026