Man van Tarsus
seun van Tarsus
sou jy kon dink
met hul klere netjies by jou voete gevou
dat die sterwende man tussen klip en stof
die hemel geopend in glorie aanskou?
man van Tarsus
sou jy kon dink
dat jy blind moes word om te kan sien
en in braak woestynland sou leer
hoe om die ware God te dien?
man van God
sou jy kon dink
dat kennis en drif, ras en geslag
vir jou drek sou word voor Hom
en dit wat vir jou wag?
(rondom die wêreld sou kerke jou naam nog dra
en geleerdes vir eeue na jou insig vra)
sou jy kon dink
man van Tarsus
kind van God
met oë wat nie meer in die dowwe spieël blink
dat jou Maranatha! Kom Here kom!
na tweeduisend jaar nog steeds sou weerklink?
© Stephan du Toit, 2026