Tortelduif
Sy het klaar skottelgoed gewas
sit langbeen voor die agterdeur
blaas ’n warm beker koffie koud
Ek wag vir stories
oud genoeg om te weet
ek glo dié wat ek wil glo
nie die een van die waterslang
ek soek net die steen se bêreplek
ek hou van stories wat my bangmaak
oor Windvoël wat in die gat in die berg woon
vandag sê sy hoor wat die tortelduif roep
“ek wil roosterkoek hê
ek wil roosterkoek hê”
luister!
nou hoor ek dit ook
maar sy woorde verander
“ek wil Worcester toe gaan “
en
“het jy dit weer gedoen?”
Ek moet aangaan met my werk sê sy
vandag is daar nie tyd vir stories nie
my eie storie loop lelik
hy het dit weer gedoen
© Anton Döckel, 2026