“Skimme en spoorsoekers” deur Martin Steyn. LAPA, 2026.
Martin Steyn is ʼn bekende skrywer van misdaadfiksie en sielkundige rillers wat dikwels fokus op die donker kant van die menslike natuur. Bekende werke sluit in sy debuut Donker spoor waarvoor hy die ATKV-Woordveertjie-toekenning vir Spanningsfiksie in 2015 ontvang het, asook ander romans soos Losprys en Donker water.
Skimme en spoorsoekers is ʼn versameling van 27 kortverhale waarvan die meeste reeds elders verskyn het. In ʼn uitgebreide Voorwoord vertel Steyn hoe die boek ontstaan het en die een en ander oor sy lewe as skrywer van onder andere gruwelverhale. Elkeen van die verhale word daarbenewens toegelig met ʼn Nota waarin Steyn die ontstaan van die verhaal en die verhaalgegewens toelig. Dié deelname van die reële outeur aan die verhale verleen wel ʼn persoonlike en outentieke stem aan die boek as geheel, maar ek twyfel of dit enige konkrete, literêre bydrae tot die verhale self lewer. ʼn Verhaal moet immers op sy eie bene kan staan.
Nietemin, hierdie leser het die boek as ontspanningsfiksie geniet. Die verhale boei die leser en die einde kom dikwels onverwags en skokkend. Elemente van die makabere, die sielkundige riller en die bonatuurlike kom in verskeie verhale voor.
Die storielyne mak dikwels staat op lotsbepalende keuses. Daar is byvoorbeeld die man wat op die punt staan om van ʼn brug af te spring en twee tieners wat besluit om ʼn vreemde lig te volg wat op ʼn gruwelike vonds uitloop.
‘n Reeksverhaal met A. O. Colin Menck, ‘n gewilde karakter uit Steyn se vorige romans soos Donker Spoor en Skuldig, bewerk aansluiting by die skrywer se wyer oeuvre.
Die boek is ook in Kindle-eboekformaat beskikbaar.
– Marlies Taljard