Fluit-fluit
Ontbinde lyke stapel op
want die pes het toegeslaan
met rotte oral ook in die strate
wat uit hul gate dit versprei
met vir mens geen antwoord meer
oor hoe om dit te keer nie.
Toe op Heilige Johannes en Paulus
se herdenkingsdag kom charismaties
die fluitspeler daar aan
en belowe teen ’n prys
maak hy van die stad weer ’n paradys
sonder enige rot of muis
wat hy toe ook vermag.
Maar deur ouers se gebrek om tussen reg
en verkeerd te onderskei,
word die kinders daarna singend weggelei
en moes die prys betaal.
Vandag beweeg alles sentrifugaal
nou probeer ons dit met kennis agterhaal
en word ons tyd se credo wetenskap
wat glo dikteer en voorskryf
daar is sentripetaal
geen metafisiese werklikheid
met geen geykte note
om ons te begelei
van waar IK-loos
agter die verpeste vals gefluit
se sogenaamde KI aan
saam gehardloop word.
Ons is almal besmet en terminaal
sonder ‘n vertroude lied om saam te sing
dat ons kinders nie weer fluit-fluit verdwaal.
© Dietloff van der Berg, 2026