verjaar
ek en jy
ry vandag
deur seepunt
verby die apostels
deur houtbaai oor
chapman’s, via vishoek
deur simonstad ry ons, by
millerspunt draai ons by die
baaitjie in, ons vlinder in die branders
ons giggel, ek en jy, liewe sestig,
wie weet, dalk ry ons op
sewentig na stilbaai, tel
tagtig by tietiesbaai
haal honderd-en…
by hondeklipbaai
of bly ons by die skedelkus
© Jeanne Henning Els, 2026