akademiese vryheid
hy tik die kode in wat die alarm aktiveer
glip huis uit sluit die bo- en onderdeur
druk grendelslot toe aan die traliedeur
laat rol elektries oop die motorhuis se deur
tru uit laat rol weer toe per afstandbeheer
ook so die uitgangskuifhek heen en weer
moet personeelkaart by die kampushek skandeer
voor die parkeerterrein se valboom weer
deur die kantoorblok-draaihek nog ’n keer
by sy kantoor gebeur dit omgekeer
die traliegrendel oopsluit dan die deur
die kode intik om alarmgeskal te keer
hy kyk sy lessenaar en boekrak deur
ná al die angsmeganika se sleur
kan hy die poorte van sy vak oopsmyt
© Bernard Odendaal, 2026