Brief aan die tinktinkievrou
Hester Serfontein (1947 – 2026)
Met Nina se geboorte vra
die hospitaalsuster in die MediClinic:
“Het mevrou ook kinders?”
Vandag sonder aarseling,
‘n lang familieverbintenis
stilweg met ‘n ompad bely.
My vader leen sy jas vir my
vir ‘n reis na ‘n ysige winterlandskap
in die verre VSA vir navorsing.
Jou seuns gee ‘n winterbaadjie
as geskenk vir my twee dae vóór
jou vertrek na dáárdie plek van rus.
Op ‘n keer, ja dit was in Hermanus
gesels ons in die onderste verdieping
van jul vakansiehuis oor alles en nog wat.
Oor my vader en moeder elegies gedig:
daardie verse geboekstaaf en ‘n Sanctum,
opgedra aan mý sielsgenote in ‘n ander tydsgewrig.
‘n Baadjie sonder einde, ‘n jas wat netjies pas;
nou vou ek jou toe, klein tinktinkievrou in ‘n vers
oor onsigbare verbintenisse én oor alles wat reg inpas.
© Joan Hambidge, 2026