In ligte sirkels vasgehou
Die NBA-speler laat die bal op sy vinger tol.
‘n Paar kinders staar hom grootoog aan –
die tyd stol.
Solank geen ander daarmee lol
bly dit om en om gaan,
laat hy die bal op sy vinger tol.
Sal dié vuuroranje bal afrol,
vra hulle oë, uit sy uitgemerkte baan?
Die tyd stol.
Buite gaan elke blom, boom, graspól,
vlinder, voël vrolik met die lewe aan
terwyl die bal op sy vinger tol.
Hoe lank nog hou hy daarmee vol,
vir mensekind wat voor hom staan?
Die tyd stol.
Sy wyse hande spin die bol
tot wet en wrywing vaart laat taan,
die bal sy laaste sirkels tol.
Die tyd stol …
© Marieta McGrath, 2026