Flenters vir lint
kom soek my in my Donkertyd
in die kamer sonder ruit
wys jy was hier
by die krake in die muur
meer as net maanskyn en rose
bly hier vir die woordelose
desolasie-dae, graffiti
bont jou naam op die murasie
wat jy telkens in jou arms neem
teer aansien vir die Colosseum
want my kop word die plek
die arena waar ek
meganies die onsigbare veg
die son se warmte is weg
kom nader, net jy
verstaan my
© Jasmyn Beetge, 2026