Anne-Ghrett Erasmus is gebore in Pretoria, maar het grootgeword in Ladysmith, Kwazulu-Natal, waar sy ook gematrikuleer het. Daarna behaal sy haar BA(Drama) aan die Universiteit Pretoria. Sy speel toneel vir o.a. SUKOVS en TRUK. Sy skryf en regiseer dramas vir die Bop Arts Council en kunstefeeste. Ook speel sy in radiodramas en doen oorklanking. Anne-Ghrett het ook lank skool gehou by die Waldorfskool in Constantia. Tans is sy kurator by die Breytenbach Sentrum en besig met haar MA: seuntjie grootmaak. Sy naam is Kobus. Wat haar skryfwerk betref, het sy al gedigte gepubliseer in ’n hele paar versamelbundels, asook ’n drama geskryf vir die Storieboomreeks vir kinders. Haar debuutbundel die lekkerste perske is ’n vy verskyn in 2011 by Benedic Boeke. |
Skilder
(In die oomblik van verf staan kop en tyd doodstil.)
Kleure smelt op die palet –
word ritme en lê sag in volle vlees.
Sabelkwasse dans en koek om die oeroue rite:
lewe te gee aan die lap.
Waaierkwasse lek oor die doek en
terpentyn versag die vloeibaarheid
met die voel en die vat van elke vorm.
Damar en roulyn verdik
en plak blink, lyf op lyf.
Nippelpuntjies verstyf onder die kielie en
sagte pienk naeltjies kruip weg in tortellinivoue.
Lywe, in en oormekaar
lewe en golf saam,
haal asem,
word taal.
©Anne Ghrett Erasmus (Uit: Die lekkerste perske is ’n vy, 2011: Benedic Boeke)