Versindaba
~ 'n Weblog vir die Afrikaanse digkuns ~

Marieta McGrath se gedig “sareltjie slaplê van klawer” was is die wengedig.

Die beoordelaars het in hierdie kompetisie veral gelet op die korrekte vorm van die limerieke. Hierdie digvorm het vaste reëls, en indien dit nie nagevolg word nie, kan die gedig nie as ‘n limeriek beskou word nie. Verder het die beoordelaars gekyk na die laaste reël, die sogenaamde “punchline” wat verrassend en dikwels grappig is. Uiteindelik is daar in die meeste kompetisies ‘n hele paar potensiële wengedigte, en ook in hierdie kompetisie was dit vir die beoordelaars moeilik om uiteindelik slegs een wengedig aan te wys. Baie geluk aan Marieta McGrath wat met die kontantprys van R1 000 wegstap!

Hoewel daar byna 70 inskrywings vir hierdie kompetisie ontvang is, het minder as 20 gedigte as limerieke gekwalifiseer en is sommige gedigte wat baie goed was, gediskwalifiseer.

Baie dankie aan elke digter wat deelgeneem het. Dit is inderdaad soms vreesaanjaend om jou werk in die openbare domein te plaas, daarom het ons soveel meer waardering vir elke inskrywing!

Die beoordelingspaneel het bestaan uit die volgende letterkundiges:

Prof. Bernard Odendaal

Dr. Marni Bonthuys

Dr. Alwyn Roux

Wengedig

Sareltjie Slaplê van Klawer

Het heeldag gedut in die hawer

Toe steek hom ‘n wespe

Net onder sy gespe

Sareltjie Styfstaan van Klawer …

© Marieta McGrath, 2021

Limerick, Ierland, waar die limeriek-vorm ontstaan het.

LW: DIE PRYSGELD VIR HIERDIE KOMPETISIE WORD VERDUBBEL TOT R1 000 EN DIE SLUITINGSDATUM WORD UITGESTEL TOT 15 NOVEMBER.

Versindaba borg in die volgende maand ‘n limeriek-kompetisie en nooi alle belangstellendes om limerieke te stuur oor enige onderwerp wat tans relevant is.

Wat is ‘n limeriek? Gaan kyk by die volgende skakel hoe Philip de Vos verduidelik hoe om ‘n limeriek te skryf:

https://www.litnet.co.za/so-skryf-mens-n-limeriek/

Enige persoon mag ‘n maksimum van VYF limerieke voorlê vir publikasie. Die bestes sal gepubliseer word. Geen addisionele limerieke mag ongeplaastes vervang nie. Limerieke word as Word-aanhangsels gestuur aan taljard.marlies@gmail.com Moet asseblief nie die limeriek as e-posteks stuur nie.

Limerieke wat aanstootlik, kwetsend, neerbuigend of beledigend is ten opsigte van mense of sosiale groepe, sal nie geplaas word nie. Vermy asseblief partypolitiek en godsdiens – dié temas kry mens maklik in die moeilikheid. Hou die limerieke lig en tong-in-die-kies!

Sluitingsdatum: 15 November 2021

Prysgeld vir wenner: R1 000.

Marlies Taljard: Inhoudsbestuurder: Versindaba