Versindaba
~ 'n Weblog vir die Afrikaanse digkuns ~

Ritueel

Skemeraande se geliefde ritueel

geskied weens die virus soms virtueel:

die skink, die klink en die fyn, fyn proe

van keurwyn – o, steeds so sensueel!’

© Ronel de Goede, 2021

Wynproe

Wag en word verlei deur die tintelgeur.

Proe liggies, en langsaam, aan die oes se keur.

Laat dit in jou mond drentel en dartel

voordat jy sluk, as die virus jou laat treur.

© Ronel de Goede, 2021

Hoe?

Hoe sou ’n mens die skakerings beskryf?

Die geure, die smake, die keurwyn se lyf?

Hoe sou ’n mens die pes kan verstaan

as jy nie met mondjiesmaat die lewe bedryf?

© Ronel de Goede, 2021

Nota op yskasdeur

Indien die Covid-pes my sou kom haal,

moenie stres nie – als is reeds betaal!

In my óú trousseaukis blink rosé en cabernet

in oorvloed (tjeers!) vir die begrafnisonthaal.

© Ronel de Goede, 2021