Nagmerrie
Daar is geen poësie
glo moontlik na Auschwitz?
Jeroen Bosch se triptiek:
deurgesaagde lywe,
folterkamers,
stank en bloed
in ‘n cauchemar.
‘n Kop bars oop
granate spat oor
die convertible
want Anita kom nooit
met die môretrein:
Zapruder op sy pos
en op youtube speel
Happy birthyday, Mr President
waar die twee gedoemdes
nou aanskou
hoe Stalin en Hitler
hul folterwoorde eet
in ‘n hel van herhaling:
die droom ‘n blote grotteschi?
Monsters en chimeras
bevolk ‘s-Hertogenbosch
toe ‘n brand in 1463
die jonge Jeroen
se dorp verwoes:
in die Museo del Prado,
Madrid word sy kuns,
echt een nachtmerrie,
agter glas gestolp:
Adorno was nooit daar.
© Joan Hambidge / 2014
Dis ‘n goeie gedig – beelding maak die stelling en dit is ‘n stelling wat werd is om gemaak te word. Dit ruk die kop en assosiatiewe velde oop. Heilna
Hou baie van die donker beelde in die gedig.