N.P. van Wyk Louw 50. Heilna du Plooy

 

 

 

Ná-gepraat

Vir N.P. van Wyk Louw

 

ons ’t weggegaan en ons bewoon

‘n windvervulde huis reg langs die see

ons vensters kyk met wydoop oë uit

op al die dae se oop-eindigheid:

 

deurskynend, alles onder hierdie son,

al ons liefdes en letsels ylheid en lig

in saffier en diep toermalyn

in akwamaryn en groen mosagaat

die vlekke en strepe bollende skuim

soos moeite, verdriet wit uitgemeet

teen die swart en blou skaduwee

van elke naggrou stormsee:

 

die see is water en wind en water

en wind en wind

en elke dag voer ons die meeue

weer en weer krummels teen die wind

 

© Heilna du Plooy

 

Bookmark and Share

Een Kommentaar op “N.P. van Wyk Louw 50. Heilna du Plooy”

  1. “Moeite, verdriet wit uitgemeet teen die Swart” Treffende segging. Evokatief. Is dit ‘n metafoor of vergelyking?

Los kommentaar

 

*

  •