Joan Hambidge. Mitopoeia

 

 

Mitopoeia

 Vir Albie Bates

 

Die private mitologie van my digkuns

dalk ‘n axolotl of salamander?

 

‘n Platanna lê glo eiers

ingespuit met ‘n swanger vrou se urine.

 

‘n Salamander vlugvoetig, genaamd

sonkyker kan vuur weerstaan bepaald.

 

Skurwejantjie in aanhouding sku vir teel

gesmokkel vir medisinale-handel.

 

Die vers stol onverwags toe ek verneem

van jou dood vanoggend,

‘n oorgang waarop ons

al lankal wag.

 

Eenspaaiig is die digter,

met die ouvolk-oog:

ontdek ‘n foto van wildeganse

in Joseph Campbell

se The flight of the wild gander:

 

goosey, goosey gander,

who wanders upstairs

and takes a man

by the left leg

and throws

him downstairs …

 

Ek sê ’n gebed op

namens jou

wat opstyg

soos daardie wildeganse,

vrygemaak in ekstase

 

en smokkel die platanna

saam met ‘n salamander in

‘n afskeidsvers vir jou.

 

© Joan Hambidge, 26 Oktober 2021

 

Bookmark and Share

2 Kommentare op “Joan Hambidge. Mitopoeia”

  1. Ria Sherriff Bates :

    Die gedig was baie vertroostend : bv die gebruik van die woord oorgang , soveel sagter as dood en an die einde visialiseer ek hoe vlieg Albie saam met die wilde ganse in die hoogte. So mooi! baie dankie, gaan dit nog baie lees en luister. Ria

  2. Joan Hambidge :

    Sterkte vir jou Ria.