Pyn het glo geen vervaldatum
Nou is dit terugkyk
op ‘n lewe aan
die einde van die jaar:
die emosionele horlosies
en affektiewe kalenders,
soos Saul Bellow dit tipeer,
staan opgeteken in Van Gennep
se Rites de passage uit 1909
vol stof en biblioteekstempels
in die Skool vir Tale se tee-
kamer waar ons filosofeer
oor liminaliteite en oorgange
van #Rhodesmustfall
en #Feesmustfall tot
‘n uiterse tyd van Onrus
en binnereise met ‘n visum
na hierdie sirkelgang
tot in my psige se Ouija-spel
van transisies en ontdekkings
dat elke hand ‘n storie vertel
reeds vertel in Job 37: 7.
La bonne aventure de la main,
as u wil, ‘n Idealistiese hand,
vol intuïsie en melancholie.
Beide gidse aangekoop
in die verre vreemde
op Harvard square voor 9/11.
© Joan Hambidge, 2021