Opruiming veertien
Dalk ‘n sonnet met presiese ryme klinkend:
Petrarcaans soos onse Francesco oor haar?
Als het glo begin in Palermo, Sisilië doerietyd.
Klein liedjies glo oor die liefde so romanties.
Hieroor het ek my al veelvoudig uitgelaat:
soveel eindes, dus soveel keer al verlaat.
Ook ek het ‘n geliefde, ‘n toeverlaat,
abandon, gekies vir iets veel dringender.
In die dertiende eeu was daar nog romantico.
Dalk was sy eerder Shakespeare se dark lady,
en steeds bly u wonder, wie was sy dan?
‘n Gedig, onthou is immer ‘n leuenspul.
Dan ‘n sonnet met presiese ryme breek
nou op in nabootsing: ‘n totum pro parte.
© Joan Hambidge, 2022