Opruiming vyftien
My vader leen my sy jas na die VSA
tydens dáárdie besoek aan New Haven.
‘n Bruin reënjas met warm tartanvoering.
Vannag droom ek van hom in ‘n hotel:
twee blazers van my pa, maar myne weg.
Ek bel hom later op in die droom en voel
die warm baadjie, sagtebokleer uit Firenze,
vou om my lyf ‘n handskoen presies.
My vader het reeds vertrek, maar laat
oorlewingstegnieke agter soos dat die liefde
van ‘n vader jou omhul, beskerm lank
ná die vertrek buite tyd of kilte.
© Joan Hambidge, 2022