Klokhuis
(vrye verwerking van Rosalía de Castro: Las campanas)
Ek hoor klokke bimbam beier
oor geboue, vlaktes, heuwels
bly die windgeruis hulle gebengel
verleng tot murmelende noot fonteine
’n sonante lammer-roep
salig soos ’n kind se singery
voël campaniles in die ruimtes
wat die eerste sonligstraal
himnies met hul stemme salueer;
primo tenore en soubrette
met canto’s a capella
om gelowiges te roep
aanmoedigend te sê hoe laat dit is:
sou hul lierelied vir ewig wegkwyn
is dit ’n oneindige verlies
want dié contralto’s, alte en tenore,
baritons en basse is elisiese klankkore
met luisterryke invokasies
hemelkuns rapsodies in ekstase
vir die hele wêreld om te hoor
want as vrede-klokke weergalm
sal alle oorlog trommelaars talm
so, as jy vra hoekom die klepels klingel:
hulle lui
oor en oor
eerstens jubelend vir my
maar ook
las campanas doblan por ti:
die klokhuis-klanklied is offisieel
as presiese fees-komposisie ingedeel
heel hoogwaardig net vir u.
© Meyer van Rensburg, 2022