Pirow Bekker. By Verkykerskop

 

By Verkykerskop

Über allen Gipfeln ist Ruh  – Goethe

 

Hoe intens die doenighede ook al was in elke kop

met sandsteenmote wat losgekap in heinings dien,

hier heers stilte nou; enkeles nog as grafstene te sien:

bakens waar dit wat verganklik is, moes stop.

 

Asof afwesig staan ‘n hoekpaal, met dunner steen gestut;

weg is sy makkers, die meeste eenmaal in gelid –

staan hy daar net soos jare terug in my geheue gegrif,

wag hy dat ek my verkyker weer op hom sal rig.

 

Wit stippels wys ‘n uilebal is op sy kruin gebraak,

die roofvoël se dieet dié keer ‘n ouvolk-akkedis,

die tenger skelet deur strale ultraviolet geblaak,

want moeilik sal dié landskap by spykerskrif berus

in dowwe vlees versteek; nog moeiliker rus gemaak

deur peil geplante klippe wat nou eensaam is.

 

© Pirow Bekker, 2022

 

Bookmark and Share

Los kommentaar

 

*