Lucky packets
By oom Piet en tannie Liet se winkel
koop ons graag in die dae van die week
toffies, suigstokkies en Lucky packets.
Teen ’n tiekie ’n pakkie bly verras
die inhoud my elke keer mateloos
en lê my kamer gou vol allerlei.
Uit die pakkies kom alles te voorskyn:
fluitjies, poppies, ’n Oosterse waaier,
paddamanne en ’n Beatles-badge.
Dan opeens kry ek ’n dinosourus
met stekels op die rug, ’n lang nek
en reusekake om hom te kan vrees.
Op pad terug plaas toe ry Pa verby
’n plek waar versteende blare voorkom,
gou stilhou, stukke optel en saamneem.
By die huis sit ek in die uitstalkas
daardie reptiel uit ’n oerverlede
wat pryk tussen figure van plastiek.
© Johann Lodewyk Marais
Jy is op jou beste wanneer die ouer persoon die jeugherinneringe oproep. Welgedaan.