Sekelbos
Dichrostachys cinerea subsp. africana
Sade in die peule ritsel
en motte fladder uit skadu’s,
hul vlerke wapper soos ’n kleed
in die intieme aanraking.
Die vlamme spel verandering
en verhaas die gang van tyd
om lewe einde toe te lei
na ’n volstrekte hiernamaals.
Liefde, vuur en dood verenig
wanneer sy haarself oorlewer
om verbrand te word, vir oulaas
warm gloei en ons sag aanraak.
© Johann Lodewyk Marais, 2022