Kevin
Life Esidimeni Healtcare-pasiënt
In die hart van die winter vertrek ons drie
met ’n bruin stasiewa uit Harrismith
na die Noorde waar ons hom gaan aflaai.
Ons ry uit die dorp waar die mis laag hang,
straatligte in die vroegmôre glinster –
dieselfde straat waar ons eens gespeel het.
Sy moeder het hom met ’n soen gegroet,
vinnig weggedraai, haar hand opgelig
om nog te wuif en haar gesig verberg.
Sy het agtergebly toe ons wegry.
Sy enkelbed vir oulaas gaan opmaak
en alleen die eerste duiwe gehoor.
“Where am I going, Dad?” wou hy weet
anderkant 42nd, terwyl die berg
in die mis verdof. “Where am I going?”
“You’ll be going to a nice farm, my boy,”
antwoord sy vader oor en oor. “My boy,”
you’ll be happy there. You’ll be OK.”
© Johann Lodewykk Marais