Amulet
Om my arm ‘n amulet van goud
‘n Pegasus en slang om die bose
af te weer, weg te keer …
Vir meer as vier dekades my behoud.
Laatnag soekend na ‘n duplikaatsleutel
(geberg in ‘n laai onder my bed vol drome)
vind ek ander sleutels, ‘n Boston-buskaart
om die tuin van Emily D te besoek, notas
oor Harvard Universiteit, ‘n brief van Pinsky.
En as bonus: die briewe tussen jou en my
op daardie herfstyd, versend van Harvard sq.
se boekwinkel vol gepak met studies oor Plath.
Die busrit na Amherst, Mass. – so word berig –
duur langer as wat hierdie spreker kon verduur:
my talisman lok bewondering af van ‘n vrou
sittend langs my op hierdie reis na die Tuin
van Woorde: beddings van apoteose durend
vol dubbelspraak; altyd in transito, onderweg.
© Joan Hambidge, 2022