Vurige bees
Dié buffel ken gʼn metafisika:
hy soek die biltong
en die brandewyn
hy sal sy kallers dissiplineer
vuiste in sy vyand sla
sy luste vir die koei verweer
as verpligte samesyn
maar geen vrae oor môre vra –
hy vat sy brannas met eish, ja,
dié buffel ken gʼn metafisika.
Alleen dié vurige bees
groei in sy swerwe
tussen hede, toekoms en verlede
oogklappe teen die spieëls
van die rede:
hy slyp sy lang mes
langs die braaivleisvuur,
raas angstig soos ʼn leë blik
oor almal wat hom wil vermoor,
stuur saans gebedjies op whatsapp
en moet beswerend op die muur
van sy facebook page die ou vlag verf.
te hel met die metafisika
die oer-aap in homself
volg, buig of bars,
enduit sy blindheid na
die prikkels van sy brein
word ʼn Koeksister, ʼn penis portret,
ketties, sannas,
klaagliedere oor woke liberals
et cetera.
En voor sy besete refleksie op die skerm
verklaar die enkeling
verwaand
hy sal ook nie terugskrik
vir die alles-uitwissende-slagveld –
maar stukkend lê alreeds
sy brose oppergesag
oor die bose skoonhede en die ander kleur.
Hy sluk nog brannas met eish, ja –
Dié buffel ken gʼn metafisika.
© Mariëtte van Graan 2023