The Ins and Outs of Life
(Vir Kobus De Kock Jnr. 30-04-1980 – 12/10/2023)
Dearly Beloved, luister dit oor en oor,
want óns wil niks meer van boosheid weet nie,
die boosheid wat uit mense borrel
soos die geskrifte vertel
dat daar in die eindtyd
nie meer liefde sal wees nie,
nie meer gesange vir die kinders nie:
een, twee, drie, vier, vyf, ses kinderlyke
voor my oë by die hospitaal ingestoot
sodat die onderdrukker
die onderdrukte
kan laat verstaan
die taal van stof tot stof, van as tot as,
is deur die mond van ʼn klein gangetjie
die Egipte woestyn in,
vir altyd by hulle tuisland uit,
om vandaar weer uitgewekenes te word,
hulle, wat vir ʼn rukkie kon sê
ons het ook ʼn huis gehad –
terug op die swerwersroete
na nêrens
Dearly Beloved, jou stem ʼn oase
vir die wat moes agterbly
en die wat nog moet gaan
want jy wil niks meer
van hierdie boosheid ervaar nie,
en tussen die snare van kitare,
tussen die stiltes wat na woorde soek
spoeg die lewe ons stuk-stuk uit
as akkoorde van mekaar se asems
en waar een of meer asem oorgaan
van long na bloed na hart
dáár skryf jou lied
vir ons vertroosting,
terwyl die westewind
jou spirit(s) laat tol oor ʼn dorre aarde
voor dit vir oulaas opspring,
die ystervarkpen wat die hemel
met gravitas deurboor
en jy wat nootvas bulder:
laat die kindertjies na my toe kom
© Bester Meyer, 2023
Remember that the AVBOB Poetry Competition reopened on 1 August 2023. Visit our website regularly at https://www.avbobpoetry.co.za/ for editing tips and advice as well as updates about upcoming workshops.
(Lesers word uitgenooi om na afloop van die lees, die lied te luister: https://www.youtube.com/watch?v=Cih-OZVEACw )