Asklepios skryf voor
Geleerde lyfartse,
misken nie langer
my versinnebeelding
deur daardie gladdebek
boodskapper se towerstaf
met sy twee bronstige adders
en daardie vieslike vlerkding
waaronder hulle fornikeer
prykend foutief
in julle spreekkamers
op letterhoofde van julle verenigings
selfs op die rekwisiete
van McDreamy en McSteamy
die beneukte House
vir die hele volk se fopgenot.
Geagte heelmeesters,
sien af van daardie
embleem van skelms
en roekelose handeldrywers
ja, ek weet privaat mediese sorg
is ’n boerpotbedryf, snyrobotte is duur
en klinieke moet blink,
maar ek sê julle nou:
hanteer siekes minder vlerkvoetig
haal obole uit dooies se monde
net kwaksalwers dra kwiksilwerstawwe.
Liewe vakgenote,
laat staan die godkompleks
en respekteer iatrogenese
leer tog óók dat slegs één
om my kierie krul
konsulteer gerus dié slang
oor die paradokse van jou beroep
skuur die ou vel af
teen hisoptakkies en berkebas
beveg gif met gif
pik om te genees
seil soms weg as dit moet
luister altyd goed
na sy vurktong in jou oor:
help as dit baat,
doen verder géén kwaad.
© Neil Cochrane, 2023
Remember that the AVBOB Poetry Competition reopened on 1 August 2023. Visit our website regularly at https://www.avbobpoetry.co.za/ for editing tips and advice as well as updates about upcoming workshops.