Anne Boyer vaar uit
In my case, however, cancer messed with the right bitch.
Skrik wakker, gefolterde vrou
kreefgewas en chemodrup waarborg
geen gelyke susterskap
net jou witgekalkte lyf
en die rooiduiwel se kotsende hel.
Ruk jou Your Oncology Journey
aan flarde en strooi dit soos konfetti
oor die uitskopstoele van die kankerpawiljoen
en die witjasse
so bedrewe in die verkoop van hoop.
Trek ’n streep deur die skitterglimlagte
op glansblaaie en versnipper obsessies
oor regte houdings en kolomme vol
snert oor selfbestuur:
positief wees is sterk wees is gesond wees…
Skeur elke donnerse strikkie
in die mooiste, mooiste maand
van bewusmakingshempies af
en stuur die spul summier terug
na die pienk kliek van die oorlewendes.
Spuitverf dan “fase 4 trippel-negatief”
teen die buitemure van die skaars lewendes
en die byna dooies in private rou
sonder die kabaal
van oorwinning.
© Neil Cochrane, 2023
Uitstekend gedoen.