Jolyn Phillips, skrywer, digter, sangeres en aktivis, het grootgeword in Gansbaai in die Wes-Kaap. Sy verwerf ’n MA in Kreatiewe Skryfkuns by UWK.
In 2016 debuteer sy met ’n bundel kortverhale, Tjieng Tjang Tjerries, wat op die kortlys was vir die Universiteit van Johannesburg debuut prys vir Suid-Afrikaanse Literatuur en dit word ook bekroon met die Nasionale Instituut vir Sosiale en Geesteswetenskappe prys vir beste fiksie.
In 2017 maak sy haar digdebuut in Afrikaans met die bundel Radbraak. In dié digbundel verbrokkel sy taal, draai sy die rug op haar vel-taal, pleeg sy ‘radbraak’ op haar eie taal. Dit is die enigste medium wat sy het, maar sy breek dit, sy vernuwe dit, sy ‘ont’taal dit. Phillips is ’n nuwe stem in Afrikaans – by tye liries maar deurgaans skreiend en ook uitdagend. Volgens die bekroonde digter Petra Müller is Radbraak ’n ‘klein aardbewing van ’n bundel. Hierdie skrywer het die Engel in die klip beet.’
Radbraak is genomineer vir beide die Elizabeth Eybers en Ingrid Jonker prys en word ook bekroon met die UJ prys vir beste debuut.
In 2020 verskyn haar tweede bundel, Bientang, by Human & Rousseau.
[Nota van die Versindaba redaksie: Ons wil graag nuwe en ou digters aanmoedig om vir ons opgedateerde profiele aan te stuur na taljard.marlies@gmail.com
Van ‘n digter wat al een of meer solo-bundels by ‘n erkende uitgewer gepubliseer het, versoek ons die volgende:
-
-
- ‘n Redelik onlangse foto in JPG-formaat
- ‘n Lys van publikasies (ook die belangrikste nie-poëtiese publikasies)
- ‘n Kort lewenskets wat inligting bevat oor o.a. waar en wanneer jy gebore is en grootgeword het, waar jy studeer het, watter beroep jy beoefen of waarmee jy jou tans besig hou, waar jy op die oomblik woon, ens.
- Enige ander interessante feite oor jou
-
Skryf asseblief die profiel in narratiewe vorm en nie as ‘n reeks feite ondermekaar nie, ten einde dit meer lesersvriendelik te maak.
Indien jy bereid is om ‘n profiel te skryf oor ‘n gestorwe digter, laat weet my asseblief by taljard.marlies@gmail.com]