Klaarblyklik ‘n Kortsluiting
Jy vermoed onraad
as jou tong weier om te praat
en jou vingers verseg om te vat.
Verbysterend verward en afgemat.
Onverwagte ontsteltenis,
buite-liggaam-belewenis.
Tonnel toets – lê net stil
(anders vat dit langer as wat jy wil).
Enjinkamer van denke deeglik ondersoek.
Bekyk bedrading in elke enkele hoek.
Stukkie vir stukkie, sistematies gesegmenteer
om katastrofiese kortsluitings te kan keer.
As ons iewers ‘n donker vlekkie sou vind,
sal jy lewenslank ‘n halwe Disprin drink.
Elke dag dankbaar daardie glasie klink
op tweede kanse wat deur Genade wag.
© Andrea Sieberhagen, 2024