rowers van seer
as ek geweet het
sou ek met ’n skip
en ’n spul lawaaierig
seer rowers, vanaand
langs jou slaapkamer-
venster stilhou
in stede daarvan
om jou drome te steel
en jou van bestaan
te ontwrig, swaai
die rowers met gevlegte tou
toegewy om jou van
ellende te bevry
op ’n eiland eensaam
ver en verlate begrawe
ons siekte, spyt en seer
jou vrese en onsekerhede
en gooi dit alles onder
die aarde se vel toe, sodat
niemand dit weer sal vind nie
en jy nooit weer pyn hoef te ken nie
eina verdwyn en drome
word eilande van hul eie
eilande soos toevlugsoorde
van deernis en draagbaarheid
met hawens en ligtorings
en skatte wat seer rowers
soos medisyne na jou toe bring
© Jak J. Brits, 2024