Demensie
(Vir Carina)
Liewe vriendin,
ons het te lank gewag.
Met blye weersien
sou ek koek en tee en lag
en onthou-jy-nog bedien.
Maar toe ek kyk in jou oë
word ek onkant gevang
deur die kyk in jóú oë
en die sluiers wat daar hang.
Ons bly doodluiters praat,
maar iets ontbreek.
Passie het jou verlaat
en dis mý hart wat breek.
Nog later kom die herhaal.
Onthou-jy-nog,
verruil vir vergeet.
Einde van ‘n vriendskapsverhaal?
Onmoontlik om die verlies te meet.
Is dit hoe dit is?
Ek gaan jou vreeslik mis…
© Andrea Sieberhagen, 2024
The AVBOB Poetry Competition reopens on 1 August 2024. Visit our extensive archive at www.avbobpoetry.co.za and find inspiration for your writing by reading the work of other poets in all 11 of South Africa’s official written languages. Follow us on social media for news, announcements and opportunities.