Cutting down to size
Telkens ‘n keer weer,
‘n cul de sac, getroebel
en getrobbel in ‘n winter ysig
met selfs klere en boeke klam.
Dit is dan waar (nie vals nie) dat die digkuns
‘n binnegeweld beskermend staan
teenoor die geweld van buite:
die dictum van die digterlike ysbreker
in Hartford, Connecticut op ‘n gewone aand
in New Haven. En J. Hillis Miller
wysend op die verbintenis tussen parasiet
en gasheer. Binne versus buite.
Ek en jy. Verlede en hede. Veral lewe
se swartspoor: dood het glo sy eie skedule,
maar poësie bly steeds ‘n paradoks:
ligene, verdigris, groenspaan met ander sinonieme
en antonieme: was dit en of dalk of?
Of dalk of, of? Ek weet nie meer nie …
© Joan Hambidge, 2024