Christiaan Diedericks. Ek is nie jou storie nie

 

Ek is nie jou storie nie

 

om die vuur van ‘n bitter toekoms

dans ek, Hiawatha, ‘n hartseer

Onondaga lied

riviere sweet

Ojibwa, gestand my naam

 

vanaand se sekelmaan

krans om my gemoed

 

wil jy my longe sien?

gebreekte ribbe

oopgesper

blood eagle

 

ek het die aarde oopgekloof

lank voor Ragnar, Sitting Bull,

Victorio en Tecumseh

 

die toekoms het in my oë kom lê

 

‘n Comanche boogskutter pyl akkuraat

hangend teen die sy van ‘n wilde perd

op vol galop

 

Geronimo, Chiricahua

legende het voor agtien

sy eerste buffelhart

gesluk

 

Apache medisyneman

in ‘n diep beswyming

uitoorlê die skoppensboer

sonder gifbolblare, grashout, of kalmoes

 

glo my slu witgesig

ons stories bly lewe

 

onder Lady Liberty

se bedrieglike koper-rok

brand ons helder

die fakkel sonder vlam

 

© Christiaan Diedericks, 2024