Christiaan Diedericks. Kneuspersblom

 

Kneuspersblom 

(‘n Ode aan  N.P. van Wyk Louw)

 

die nanag struikel

 

verblind deur

‘n sliert son

val die maan oor die afgrond

van die dag se breek

 

heuningbye drup

uit gestolde lug

selfmoordvlieëniers

daar is geen wolk in sig

 

tussen boesmanwaatlemoen,

naaldboom, amarantstruik,

suurturksvy en woestynvlas

kriewel maaiers

in die voue van ‘n bries

 

mossies murmureer

krieke kwaad

vlinders vlam

ooie ontlam

 

my binnegoed knoop

 

die wind

hoor lankal nie meer

die donderweer

se knaende geroep nie

 

die aarde rimpel

 

bid vir reën

 

drie somers lank

verlang die halfmensplant

na haar kneuspersblom

 

© Christiaan Diedericks, 2024