Prof. Alwyn Roux in gesprek met prof. Jan Pretorius
Vroeg Saterdagoggend het ‘n hoogs stimulerende gesprek tussen proff. Alwyn Roux en Jan Pretorius oor Pretorius se pragtige Naledi-bundel, Stil gesprek, plaasgevind. Pretorius het getref met die diepte van sy gedagtes. Die 28 ekfrastiese gedigte by die briljante natuurfoto’s van die internasionaal bekroonde fotograaf Geo Jooste het onlangs ‘n uiters positiewe resensie van prof. Marlies Taljard ontvang. Van die gedigte is as “briljant” beskryf. Roux het vir Pretorius uitgevra oor die ontstaan van die gedigte en hy het gewys op die invloed van ‘n trotse tradisie van gesprekke met en oor diere in Afrikaans, soos Dana Niehaus se Jakkals en Wolf-stories. Hy het ook ‘n gedeelte van die sangeres P!nk se lied A Million Dreams laat voorspeel om te illustreer hoe fundamenteel dié lied was by die skryf van die mooie Droom:
Met jou horings kan jy ‘n leeu deurboor,
die tint van jou vel herinner aan halssierade.
Kom, beminde, laat ons feesvier met tsamma-sade.
My hart drup granaatsap as ek jou hoor.
In jou is ek bitterkambro wat pienk blomme kry;
nes weerlig slaan jy geel in my.