Visse
I Ghieliemientjie (Enteromius paludinosus)
Dié ghieliemientjie van die Mwaru-,
Naivasha- en Victoriameer
en die bolope van die Lualula,
Lualaba en Lufira roer ook hier
op die helder bodem van Klipgat.
II Moggel (Labeo umbratus)
In die modderpanne van ’n osbog
klewe derduisende taai viseiers
aan die grashalms van die rante
in die vunsige water van die pan
waar snotterlelle en detritus lê.
III Kleinbekgeelvis (Labeobarbus aeneus)
Die wit-en-rooi dobbertjie skiet vinnig
stroomop, want ’n geelvis kies die klippe
in glashelder water as gevaar dreig
tot hy vinnig in die stroomversnelling
omdraai en vir oulaas goudgeel opspring.
IV Spieëlkarp (Cyprinus carpio)
Ons sit by Arbuckledam, van kant tot wal
deur die spruite gevoed en die tuiste
van die spieëlkarp met groot, blink skubbe,
lang rugvin en ’n laag slym oor sy lyf
om waterbeweging in toom te hou.
V Baber (Barbus barbus)
Weer moet ek jou uit die modderwater red
waar die son skroei en al die water trek,
julle geil aangeteel het, bly wriemel
as stil getuies van aardverwarming –
nou in anno 2024.
VI Bruinforel (Salmo trutta)
Uit die koel water van die Mkomazi
kry die Mooirivier rigting deur berge,
verby Kamberg en deur die doringveld;
en in die yl strome en versnellings
wag ’n droë vlieg die bruinforel in.
© Johann Lodewyk Marais, 2024