Verlossing
Jy is my movie
my gedig
en my gebed,
het hy op Whatsapp en Facetime verkondig.
‘n Profesie na ‘n beloofde land
met hom as die redder.
Soos ‘n uitverkorene het sy hom geglo,
dorstig gevolg uit die hart se woestyn
– haar geloof groter as net ‘n mosterdsaad.
Maar sy draaiboek het ontrafel,
sy gedig ontknoop in rymlose
klakkelose metafore
en geen vuurkolom, goue kalf,
of gebed
kon haar van sy valsverraderlike leuens
en kanteldans plunder red.
© Albi Prinsloo, 2024