Young ones have more fun
(Metro, 12/2/2026; Metro.co.uk)
As jongmens van sestien jaar
en agtien maande
staan sy op die drumpel van die lewe:
die aarde sirkel stadig
elke dag lank uitgerek
maar die musiek is prestissimo
die lewe opgewek
Op drie-en-dertig en vier maande
begin musiek-tempo’s halveer
allegro moderato
maar die lewe meer intens en besig
met ’n man, gesin en kind
totdat die lewens-omwentelinge
op vyf-en-veertig besinning bring
alhoewel die dae steeds vinniger gebeur
en sy, nou in andante bui,
skaars by bly maar tog probeer.
Later, op agt-en-sewentig, is die sirkels
kort in accelerando gering
sodat jare vlieg met ’n kraak en gekras
tot, uiteindelik, in larghissimo,
die musiek en sang uitloop
op die klik-klak van die stilus
wat, repeterend met elke kring
kort en bondig
net die einde van die sirkels bring
© Meyer van Rensburg, 2024