Gevaarlike Roete op Tafelberg eis nog ‘n lewe
Die Burger, 28 Feb, 2021
Hier klim ons oor die aarde,
die blougroen-sfeer, se lewende rots-liggaam
skrikkerig op soek na bestaansreg
half besope uit die see se bare
skuifel ons oor dorstige klip-en sandwoestyne
bangerig beklouter ons sy krom rug
beklim sy lewensgevaarlike hoë bergribbes
beloop sy plat maagvlaktes effens meer vertroulik en gerus
beangsd beloer ons sy donker spelonkholtes
om dalk diep en ver in weg te kruip
van dreigende gevreesde ellendes
soos tsunamigolwe wat verwoes:
maar…
dáár
word wolkvlerke onbevreesd bewandel
windkolomme bloots bery
en seëvierend
oor bedaard-beveelde golwe gegly.
Vir my om te wil meegaan,
moet ek hoogstens
kortliks begin vlieg:
die hemelse ewigheid in
sodra ek hier
ruggelings
daal.
© Meyer van Rensburg, 2024