Verlore Grond
’n oorryp wond
hang gesper in die lug
my pyn is ’n smeulende tou
wat vleg deur die klowe
in die palm van die dag
die wind fluit
oor skedelwit duine
waar niks groei nie
behalwe swye
in die skemer tjank ’n jakkals
sy honger gehaak aan gister
met oë soos droë putte
sy pote krap in die kluite
op soek na senings
en verlossing
die stilte se tong
gly deur my trassiebos
ek buig agteroor
soos die roesende draad
wat my vel nog onthou
die son is oud en moeg
die kaalte bibber
soos ’n sterwende
aasvoëls skeur repe
verlange
uit die stof
© Christiaan Diedericks 2025