die wêreld in
ek was verras toe ek in sy testament lees
dat hy veras wou word
hoe werk die opstanding-storie dan?
‘n begrafplaas is vir my ‘n biblioteek
van stil stemme waardeur ek kan stap
grafstene hardop lees en dan wag
vir ‘n stem om terug te fluister –
meeste stene swyg egter
maar veras
dis soveel beter
moet ek hom gelyk gee
dit verander elke wildvlaag
elke breek van ‘n brander
elke stofkorrel en reëndruppel
in draers van sy stem
dit kom suis deur die herfsbome
kom ruk die ruite in hul rame
en word die stilte tussen twee sinne
die boek lê nie meer op die rak nie
‘n opgestane storie die wêreld in
© johan swanepoel 2025