Perifrase
In Jesaja 12 vers 3 onderstreep
in my Bybel (geskenk van my ouers)
oor die heil wat ons uit fonteine
sal skink, rig my dag tydens ‘n hittegolf.
‘n Klein knopiespinnekop onsigbaar
weef ‘n netwerk ágter my koffiemasjien
langs ‘n wegneemete uit die Ocean Basket;
drink ‘n allergiepil vir wat-ook-al, vervaard.
Hier is genoeg brood en water in my huisargief
vol boeke, films, notas en so uit die hoek van my oog,
dié wete het alles reeds beleef, gesien, gehoor
stamelend om tot die uiteindelike punt te kom.
Omnia mea mecum porto, aldus Cicero, dra ek
alles saam van ver tot hier, soekend na ‘n slotkoeplet.
© Joan Hambidge, 2026