oertaal
patat, liewe ding
somma van alle strofes
somwyle ‘n doring & immer ‘n kordate toring
my tong verdool
in die oorvloed van jou tuin
jy smoor my sugte sag in jou santekraam
jou donker geur & duister woorde
‘n klinkende beitel blink en afgebraam
argot breek stuk-stuk uit jou ruigtes los
ingeryg soos krale of tekens op ‘n notebalk
in rye soos bome in boorde
die loeb-doeb jambemaat van ‘n hart
is die voetval versvoetig afgejaart
dit is ook taal ‘n vooraftaal
rym en beeld ontbloot musiek in die ritme-stroom
‘n oerbegrip voor ons woordeliks verstaan
woorde veredel veel later eers tot begrip
loeb-doeb loeb-doeb loeb-doeb . . .
liefsteling,
jou heupe antwoord ritmies
op vaste maat van heffings en dalings
my geworpenheid besweer
jy’s ‘n pasaangeër vir my hart
metronoom wat my tydig hou
wanneer my voete die maat verpas
my kamerkantate my meerstemmige motet
die opsetlikheid van woode is
jou souterige trane jou sag geswolle lippe
jou origheid benieu my
die nagloor is ambergoud en soet in my mond
© Wynand J Booysen, 2026